UOLI VOLOXU ANE IUDASI MUKAUKAVU MULAI NOXI'A TA MITEMA NOXOU LATAUA
Vaikala lamana
Uoli voloxu noxou Iudasi 'o ne anu iouvilesisi loxo uoli voloxu noxou Pita ta tameisou. Anu mupelea'a lexe ilaxa'ine'i noxi'a ta tisa kalakalavoi e i'oxo lexe ane'i mimuxaxu tane'i noxou Iesu kalumo. Anu muvikalane'i lamana lexe itulu pekia'a no anu muxamuxaxu tane'i noxou Iesu e mino'u tei ne. Ia itema vile umomomo sou uxiunu vikalasou mii ane temuxaxu tanenge no anu tei ne uasi (3).A'alo muai no nano aloxo 'oVaikala lamana 1-2Tava'u loxova la sou Iudasi mukaukavu 'o 3-4Ngalaxa'ingengi noxi'a ta tisa kalakalavoi 5-16Ngamuxaxu tangengi maninasou xe ngatulu pekia'inge 17-23Vaikala kaluxusou 24-25
Jude
1 aEni Iudasi, eni ekaukavunu vaivai-kala ane 'o ulai noxinge ngingi ane Lataua Maminge mu'avalinge. Anu mumasaxainge xe ngingi ngaxolu no anu saxisaxila'u noxou Iesu Kalisito. Eni amitema sou xaixai vitanisi noxou mo eni Iakovo vimou.2Eni alinga lexe 'ili'ilixo sou alauna mo opo se'isisi xe 'ilixo sou ngamasaxainge ngatongato'o uleme no anu maulingenge.
Ta Mitema Mose'i Ilosiengixu A'alo Vilemo
3Ta menexilo e eni emasaxainge. Eni emasaxa manina lexe apasipaa mo akaukavu ulai noxinge sou ngapamauli ane nenge nenge'a teno'u, ia eni akaukavu aloxo ne uasi, elavusou lexe eni akaukavunusi mo avikalangengi pekia'u lexe ngingi ngatulu pekia'inge no anu muxamuxaxu tangengi ane Lataua mu'italonu mulai noxi'a ta mitema noxou tei. 4 bXo ta mitema mose'i mitalume mo mi'una mixolu no taiingengi. Ia ta mitema aloxo ne, Lavuku Tavuna muvikala tatei lexe Lataua utulusi'a no anu vaivaikala, xo ane'i mixiu tumali'au mo ane'i mixiunu vaikala sou alauna noxou Lataua sou imulinu 'ili'ilixo masumasua xe misingisou Iesu Kalisito ane Anusisi usaxila'inge mo Tila noxinge.5 cNgingi ngelavusou mii ane 'o mukalu ne. Ia eni emasaxa lexe avikalangengi la. Tila mulaane'i ta mitema noxou ne Aixiputo, ia ili'i la anu mukalusi'a ane'i ane imulaxu tane'i noxou uasi. 6 dMo ta angelo ane Lataua mulosi'a xaixai ne, ia mialasou pilixasou xaixai noxi'a la anu musakisakine'i no anu lamota ane umomomo sou uxoto uasi mo mitatuxa'a no isivoxo ulai utalo no voxo tila ane itulu no anu vaivaikala. 7 eMo anu aloxo ta Sodomu ilo'a ta Xomola mo ane'i ane mixolu 'alai noxi'a. Ane'i milosou maulixa'a no anu 'ili'ilixo sou vote'i mo masaxa masua noxi'a ne mu'oxone'i la ixiui'a la. Ta mitema aloxo ne mitovola'inu lexe ane'i ta mitema loxo ne ino'u navunavu no anu navu ane kaluxu uasi.
8Ia ta mitema ane mitalume mo mixolu no taiingengi ne, ane'i imulimulinu 'ili'ilixo masumasua aloxo ane'i ne. Ane'i ta mitema sou aipiepiena mo ane'i me'a i'oxo masua vasime'a mo mixiu tumali'au xavi noxou Lataua la mivikala masua noxi'a ane'i ane ta lailaixe ixoxolu teitexi. 9 fIa no mine tila noxi'a ta angelo Mikaeli ilou Satani mi'otosou anaxa'asou Mosesi vasimolu, la anu ulea vaikala vile masua noxou Satani uasi ia anu muvikala lexe, “Tila ukaitoloneni!” 10 gIa ane'i ne, ivikala masua no anu mii ma'ia ane ilavusou uasi. Ia mii ma'ia ane milavusou no mine mipaa no lia 'o ne, anu aloxo lavulavu noxi'a ta a'aa e xavutalai'a uasi. Lavulavu aloxo ne, anu molu u'oxo masuane'i.
11 hAne'i ixalisou tu'utu'umaxu tatila! Xo ane'i imulinu 'ili'ilixo noxou Kaini mo ane'i mimasaxau lamoli la mimulinu kalavoi noxou Balamu. Xe ane'i mixiu tumali'ai'a ta mitema ane Lataua musosovosi'a loxo Kora mu'oxonu. 12 iXe ngingi ngemasaxainge ngatongato'o ia ngapita sou nga'ani, la ane'i itaxa uasi ine'e ixolu i'ani ulu'esi. La 'ilixo noxi'a ne, anu loxo nuni vile muxolu no anu lavalava kea. Mo ane'i me'a isaxila'asi, la sou ane'i loxo tamuxala vitanisi e atume utavutavulenu ia la'iua uxali no anu uasi. Mo ane'i loxo ovu ane voxosou sou unene'a ia temanu uasi muxalo la miluvunu. Ta mitema ane loxo ne, isoli alaxu tamei aloxo ovu ne. 13Mo ane'i 'ili'ilixone'i ne, imaelamulinu loxo xasi no luaki une'e upei la livilivixu. Mo ane'i aloxo ta oto ane ixolu tanixa'a vilesisi uasi, la Lataua umulaxa'a no isivoxo manina ane ukalu uasi.
14 jAdamu 'ilusunu, anu Enoko mupalomatanangengisi'a ta mitema ne aloxo 'o, “Ngamaisou, Tila unene'e ilo'a ane'i ane noxousi. Itiitisi'a ne tavu'alo tavu'alo manina. 15Anu une'e sou utulusi'a ta mitema ukalusi no anu vaivaikala mo ulosi'a ta mitema latala ane mixiunu tumali'au noxou Lataua navunavu. Xo ane'i mi'oxonu 'ili'ilixo masumasua ane umomomo no iou Lataua uasi, mo ane'i itaxaanu uasi la ane'i milea anaxa'a noxou.” 16Ta mitema ane ne, ikaalapu utotomu mo ikamuli susu noxi'a ta mitema mo imulimulinu masaxa masua sou vasime'a. La i'itinu ualasi'a xe i'itinu ta mitema ualasi'a vitanisi sou ino'u mi'ami'a.
Ngasaxila'ixe Laixe
17Ia ta menexilo e eni emasaxainge. Ngaxavutalanu vaivaikala ane ta mitema ane Tilasinge Iesu Kalisito mupalusi'a mitotokalasou. 18 kLa ane'i mivikalangengi aloxo 'o, “No anu voxo kaluxusou, la ta mitema imolovila'isou a'alo laixe xe imulinu masaxa masua noxi'a ane Lataua u'osasou uasi. 19Ta mitema ane ne, mo Uleenu Tavuna uxolu noxi'a uasi, ane'i sou ikalipalangengi la sou ane'i imulinu masaxa ane muxolu noxi'a no mine mipaa no lia 'o.20 lIa ngingi ta menexilo e eni emasaxainge. Ngingi ngamulaxu tangengi noxou Lataua anusisi mo ngasu'ulingengi mo nga'oxonu pakia'inge ngatongato'o loxo ngingi ngapita sou ngatulusou tani vile mo ngakilaka no anu xavi noxou Uleenu Tavuna. 21La ngaxolu loxo Lataua mumasaxainge mo ngaxomaiou voxo ane Tilasinge Iesu Kalisito mualaunasinge sou ulosinge mauli ane kaluxu uasi.
22Nga'oxo alaunasi'a ane'i ane ixavutala piena 23 mMo ngapamauline'i ane'i ane sou i'ela no navu mo nga'oxo alaunasi'a ta mitema mose'i la ngasaxila'inge laixe. Mo ngaxolu va'axu no anu 'ili'ilixo masumasua e i'oxo'oxonu loxo nga'umolu lavalava e pita muteiteisou.
Ta'itinu Lataua Ualasou
24Nenge ta'itinu ualasou anu ane umomomo sou usaxila'inge la ngalapau uasi mo ngasusu uasi la uno'inge ngalai ngaxolu no pa'umolu ane lailaixe. Ngaxolu la nga'osa'osasi. 25 nAnu Lataua anusisi mupamaulinenge noxou Iesu Kalisito anu Tila noxinge. La sou nenge ta'itinu ualasou mo tataxanu mo ta'osasou saxisaxila'u mo xavi noxou musoko tatei no mine anu mukoinu mimii mo mune'e mutalo vaimomo 'o xe ili'i la mo kaluxu uasi. Manina.
Copyright information for
ATA